Алғашқы Атом электр станциясының қалай аталатыны белгілі болды
Қазақстанда еліміздегі алғашқы атом электр станциясына атау беру бойынша өткізілген жалпыхалықтық байқау аяқталды. Нәтижесінде тұрғындар ең көп ұсынған атау – «Балқаш» атом электр станциясы – жеңімпаз деп танылды. Бұл туралы Атом энергиясы жөніндегі агенттіктің баспасөз қызметі хабарлады
Байқау Президент Қасым-Жомарт Тоқаевтың 2025 жылғы 11 тамызда жариялаған тапсырмасына сәйкес ұйымдастырылған. Үздік атауды таңдау eGov Mobile платформасында 25 қыркүйек пен 10 қазан аралығында өтті.
Байқау қалай өтті?
- Байқауға 16 жастан асқан 27 157 қазақстандық қатысты.
- Әр адам бір ғана атау ұсына алды.
- Жалпы ұсынылған нұсқалар саны — 10 460 (қайталаулар, кирилл–латын әріптеріндегі нұсқалар және мағыналас сөздер ескерілген).
- Конкурс комиссиясы талқылауға ең көп ұсынылған 100 атауды шығарды.
Нәтижесінде «Балқаш» атауы 882 азаматтың ұсынысымен бірінші орынға шықты.
Сарапшылардың пікірінше, нысанды географиялық ерекшелігі бойынша атау — атом энергетикасында кең таралған халықаралық тәжірибе.
АЭС атауы үш тілде бекітілді
Комиссия нысан атауын үш тілде мынадай түрде қабылдады:
- Қазақша: «Балқаш» атом электр станциясы
- Орысша: Атомная электростанция «Балхаш»
- Ағылшынша: Balkhash Nuclear Power Plant
Жобаға қоғам өкілдері, креатив индустрия мамандары, атом энергетикасы, филология және тарих саласындағы сарапшылар қатысқан.
