Пікірталас мәресіне жетті: Құрылтай сайлауы алдындағы соңғы теледебат қалай өтті?

«Хабар» Агенттігіне қарасты «24KZ» телеарнасының тікелей эфирінде ел тарихындағы тұңғыш Құрылтай сайлауы қарсаңында саяси партия көшбасшыларының қорытынды теледебаты өтті. «Дамыған экономика – қуатты қоғам» тақырыбындағы іс-шара бұрын-соңды болмаған ауқымды деңгейде ұйымдастырылды.

Бұл жолы пікірсайыс алаңында саяси ұйымдардың қатардағы өкілдері емес, еліміздегі барлық жеті партияның тікелей көшбасшылары өзара саяси дебатқа түсті.

Заманауи технология мен халықаралық телекөпір

Дебат барысында тікелей трансляция арқылы елдің барлық аймағы қамтылды. Іс-шара басталмас бұрын эфирде жеті партияның сайлауалды штабтарынан тікелей қосылымдар ұйымдастырылды. Сонымен қатар Агенттіктің АҚШ, Қытай және БАӘ-дегі меншікті тілшілері Қазақстанның саяси өміріне бейжай қарамайтын шетелдегі азаматтардың қатысуымен телекөпір өткізді.

Арнайы превью-бағдарламамен басталған «Басты дебат» мазмұнымен ғана емес, ұтымды режиссерлік шешімімен де ерекшеленді. Ол заманауи технологиялар, қызу пікірталас, халықаралық телекөпірлер және партия жақтастарының шынайы эмоциясын үндестірген ауқымды дискуссия алаңына айналды.

Сайлаушылардың 59 мыңға жуық сауалы

Экранның ар жағында отырған көрерменнің де саяси додаға тікелей қатысуына толық мүмкіндік жасалды. Сайлаушылар өздерін толғандырған сұрақтарды QR код арқылы партия көшбасшыларына жолдап, нәтижесінде азаматтардан 59 мыңға жуық сауал келіп түсті. Ең өзекті сұрақтар дебаттың үшінші раундында саяси партиялардың басшыларына қойылды.

Көрермен саяси доданы 24KZ телеарнасынан, сондай-ақ арнаның YouTube, Telegram, TikTok, Facebook және Instagram желілеріндегі ресми парақшаларынан онлайн режимде бақылады.

Партия көшбасшыларының негізгі ұстанымдары

Дебат барысында жеті саяси партияның басшылары мемлекетті дамыту, экономикалық саясат, әлеуметтік сала және азаматтардың өмір сүру сапасын арттыру бағытындағы ұсыныстарын таныстырды. Ашық пікірталас саяси көзқарастарды салыстыруға және партиялардың ұстанымдарындағы айырмашылықтарды көруге мүмкіндік берді:

• «Respublica» (Айдарбек Қожаназаров): Жеребе бойынша бірінші болып сөз алып, халықтың әл-ауқатын арттыру мен әлеуметтік жағдайды жақсартуға, сонымен қатар кәсіпкерлікті дамытуға арналған ұсыныстарын айтты.

• «Baytaq» (Азаматхан Әміртаев): Көрерменнің «алдымен экологиялық туризмді ме, әлде санаторий-курорттық орындарды дамытқан жөн бе?» деген сұрағына жауап бере отырып, экотуризм экономиканың локомотивіне айнала алатынын мәлімдеді.

• «Ақ жол» (Дания Еспаева): Кез келген ұйымның негізгі мақсаты – еңбек еткен адамға жол ашып, ел байлығын халықтың игілігіне жұмсау екенін жеткізді.

• «Әділет» (Айбек Дәдебай): Партия Президенттің саяси бағытына тірек болатынына тоқталып, «әділет» принципі күнделікті өміріміздің бөлшегіне айналуы тиіс екенін мәлімдеді.

• «Ауыл» (Қайрат Айтуғанов): Ауыл тұрғындарының табысын арттыруға қатысты сауалға жауап беріп, партияның сайлауалды бағдарламасындағы басым бағыттарды егжей-тегжейлі түсіндірді.

• ЖСДП (Асхат Рахымжанов): Өз сөзінде халық жай ғана жұмыс істеп қоймай, соған лайықты табыс алуы маңызды екенін атап өтті.

• ҚХП (Нұрсұлтан Шоқанов): Экономикалық даму әр өңірдің өзіндік мамандануына негізделуі тиіс екенін алға тартты.

Қорытынды

«Басты дебат – 2026» аяқталды. Жеті саяси партия өз бағдарламасын, дәлелдері мен елді дамытудың негізгі тетіктерін ортаға салды. Дебат ашық саяси диалог алаңына айналып, сайлаушыларға партиялардың ұстанымын тыңдауға және олардың ұсыныстарын өзара салыстыруға мүмкіндік берді.

Айта кетейік, сағат 22:00-де тікелей эфирде саяси сарапшылардың қатысуымен теледебат барысында айтылған уәждер мен берілген уәделер, елді дамытуға қатысты тетіктер талқыланады. Теледебаттың толық нұсқасын 24KZ телеарнасының YouTube арнасынан көруге болады.