Қазақ шаруалары Грузияға ет және сүт өнімдерін шығаратын болды

20-24 мамыр аралығында Грузияда сүт және ет өндірісіне арналған Dala.Camp Georgia халықаралық салалық форумы өтті. Форумға Қазақстан, Грузия, Өзбекстан, Әзірбайжан, Қырғызстан, Тәжікстан және Түрікменстан бастаған 7 елден келген 100-ден астам компания өкілдері бас қосты, деп хабарлайды tiek.kz.

Бес күнге созылған форумда фермерлер, өңдеушілер, инвесторлар және сала сарапшылары саланы дамытудың және өнімнің бәсекеге қабілеттілігін арттырудың негізгі трендтерін талқылады.

Айтпақшы, форумның басты оқиғаларының бірі Turan қазақстандық мал өсірушілер қауымдастығы, Trouw Nutrition (Нидерланды) және Nutrimax (Грузия) арасында өзара түсіністік туралы меморандумға қол қоюы болды.

Құжат тараптардың мал шаруашылығындағы ынтымақтастықты дамыту, оның ішінде тиімділікті арттыру және шаруашылықтарды азықтандыру мен басқарудың заманауи тәсілдерін енгізу ниеттерін бекітті.

Келісім қазақстандық мал шаруашылығы өнімдері – ет, сүт, тері, жүн және басқа да өнім түрлерін экспорттауға жәрдемдесуді көздейді.

Ынтымақтастық жемшөп өндірісі, генетика, ветеринария және фермаларды басқарудағы технологиялар алмасуды, сондай-ақ бірлескен білім беру бастамаларын қамтиды.

Форум аясында жұмыс кездесуі өтті, оған Turan қазақстандық мал өсірушілер қауымдастығының басқарма төрағасы Жәнібек Кенжебаев және Грузияның қоршаған ортаны қорғау және ауыл шаруашылығы вице-министрі Лаша Авалиани қатысты. Тараптар қазақстандық мал шаруашылығы өнімінің Грузия нарығына және Грузия арқылы халықаралық нарықтарға экспортын дамытуды, сондай-ақ Қазақстанның мал шаруашылығы саласына грузин инвесторларын тартуды қоса алғанда, институционалдық өзара іс-қимыл перспективаларын талқылады.

Жақын арада Грузияның салалық министрлігімен жеке меморандумға қол қою жоспарланып отыр.

Turan ассоциациясының басшысы, Dala.Camp қауымдастығының негізін қалаушы Жәнібек Кенжебаев: «Бүгінде Қазақстан мал шаруашылығын дамытудың ашық, технологиялық және экспортқа бағдарланған жаңа моделін қалыптастырып жатыр. Форум алаңында қол жеткізілген уағдаластықтар — бұл жай ғана формальдылық емес, біздің нарықтарымызды интеграциялаудың практикалық қадамы. Біз білім алмасудан — бірлескен жобаларға, диалогтан — нақты жеткізілімдер мен серіктестіктерге бағытталған жүйелі қозғалыс туралы айтып отырмыз», — деп атап өтті.

Форум аясында қатысушылар рациондарды қалыптастырудан және азықтандыруды басқарудан бастап шығындардың төмендеуіне және шаруа қожалықтарының өнімділігінің өсуіне дейінгі мал шаруашылығының тиімділігін арттыру үдерістерін талдады. Сандық құралдарға, соның ішінде NutriOpt бағдарламасына және оның практикалық қолданылуына ерекше назар аударылды.

Кахетия аймағындағы Nutrimax заманауи өндірістік кәсіпорнына бару бағдарламаның негізі болды, онда қатысушылар жем өндіру технологиясымен, сапаны бақылау жүйесімен және өндірістік процестерді ұйымдастырумен танысты.

Форум бағдарламасында Қазақстаннан келген практикалық кейстер де маңызды орын алды. Қатысушылар сүт және етті мал шаруашылығында, соның ішінде шаруашылық экономикасында, басқарушылық тәсілдерде және бизнесті масштабтау модельдерінде тәжірибе ұсынды.

«Қазақстан бүгінде тәжірибені қабылдап қана қоймай, халықаралық деңгейде қызықты әрі қолданылатын шешімдерді ұсына отырып, сараптама көзіне айналуда», — деп атап өтті Жәнібек Кенжебаев.

Dala.Camp Georgia спикерлерінің құрамында: Нидерландының Грузиядағы елшісі Мелина Аракелян; Trouw Nutrition Шығыс Еуропа және Орталық Азия бойынша коммерциялық директоры Роланд Ван Дален; NutriOpt практикалық диеталар және Trouw Nutrition жемшөп қоспалары жөніндегі маман Ярослав Ципс; Nutrimax негізін қалаушы және басқарушы серіктес Бека Бекаиа; Nutrimax бас директоры Гиорги Читаишвили; Nutrimax Kazakhstan директоры Реваз Лапачи; Tiar-Invest зоотехнигі (Өзбекстан) Дильшод Набиев; Unicorn Feed Limited CEO-сы Руслан Какенов және т.б. болды.

Ұйымдастырушылардың айтуынша, Dala.Camp өндірушілерді, инвесторларды және сарапшыларды мал шаруашылығын дамытудың жаңа күн тәртібіне біріктіретін халықаралық кәсіби қауымдастықтың бас қосу орнына айналып келеді.

«Бүгін біз толыққанды экожүйе — саланы талқылап қана қоймай, оның болашағын бірге құратын адамдар қауымдастығы қалыптасып жатқанын көріп отырмыз. Dala.Camp Қазақстан аймағынан шығып, білім, технология және бизнес үшін халықаралық платформаға айналып жатыр», — деп толықтырды Жәнібек Кенжебаев.

Естеріңізге сала кетейік, 2026 жылдың ақпан айының басында Turan мал өсірушілер қауымдастығы Бурабайда 11 елден 250-ге жуық делегатты біріктірген Dala.Camp халықаралық форумын өткізген болатын.

Экожүйені дамытудың келесі кезеңі Dala.Camp ұлттық мал шаруашылығы экспедициясы болады. 2026 жылғы 1 мамырда Астанада басталатын жоба еліміздің кемінде 10 өңірін қамтиды, 40-қа жуық қатысушыны біріктіреді және реалити-шоу элементтері бар далалық білім беру медиа жобасы форматында өтеді. Қатысушылар 6000 км-ден астам жол жүріп, жетекші шаруашылықтарға барады және сала бойынша практикалық тәжірибе алады.

Экспедиция Dala.Camp бастамаларының логикалық жалғасы және мал шаруашылығын танымал етуге, адами капиталды дамытуға және Қазақстан экономикасының өсуінің негізгі нүктелерінің бірі ретінде салаға жаңа көзқарасты қалыптастыруға бағытталады.