Каспийдегі трагедия: Халық Кеңесі мүшелері қаза тапқан сарбаздардың отбасыларына қомақты қаржы бөлді

Қазақстан Халық Кеңесінің мүшелері Шахмұрат Мүтәліп пен Гаджи Гаджиев Каспий теңізіндегі оқу-жаттығу кезінде қаза тапқан әскери қызметшілердің отбасыларына қаржылай көмек көрсететінін мәлімдеді, – деп хабарлайды Tiek.kz.

Екі қоғам қайраткері де қаза болғандардың туған-туыстары мен әріптестерінің қайғысына ортақтасып, көңіл айтты. Олар бұл көмек мемлекеттік қолдауға қосымша ретінде әр отбасына жеке тәртіппен көрсетілетінін жеткізді.

Кәсіпкерлер қандай көмек ұсынды?

Қазақстан Халық Кеңесінің мүшесі, кәсіпкер әрі Қазақстан бокс федерациясының президенті Шахмұрат Мүтәліптің айтуынша, Integra Construction KZ компаниясы қаза тапқан әрбір әскери қызметшінің отбасына 25 миллион теңгеден бөледі.

«Қайтыс болған баланы ешқандай ақша қайтара алмайды. Алайда мұндай ауыр сәтте бірде-бір отбасы қайғысымен жалғыз қалмауы керек», – деп жазды Шахмұрат Мүтәліп.

Ал Халық Кеңесінің тағы бір мүшесі, Қазақстан ауыр атлетика федерациясының президенті Гаджи Гаджиев марқұмдардың отбасыларына жалпы көлемі 100 миллион теңге материалдық көмек көрсету туралы шешім қабылдағанын хабарлады.

Трагедияның мән-жайы және Жалпыұлттық аза тұту күні

Еске салайық, 24 қыркүйекте Каспий теңізінің жағалауында оқу-жауынгерлік тапсырманы орындау кезінде ауа райы күрт нашарлап, дауылдың салдарынан әскери қызметшілерді теңіз суы ағызып әкеткен болатын.

Үкіметтік комиссияның нақтыланған мәліметіне сәйкес:

• Теңізге барлығы 17 әскери қызметші кеткен;

• Оның 12-сі қаза тауып, үшеуі аман құтқарылды;

• Тағы екі әскери қызметшіні іздеу жұмыстары әлі де жалғасуда.

Қазіргі уақытта бұл қайғылы оқиғаға байланысты қылмыстық іс қозғалып, мән-жайды толық анықтау үшін арнайы жедел-тергеу тобы құрылды.

Сондай-ақ, Қазақстан Президенті Қасым-Жомарт Тоқаевтың шешімімен 25 қыркүйек – Қазақстанда Жалпыұлттық аза тұту күні болып жарияланды.