«Жетімдерге берілген пәтерлерде бөтен адамдар тұрып жатыр» – депутат

Сенат отырысында депутат Андрей Лукин жетім балаларды баспанамен қамтамасыз ету жүйесіндегі күрделі проблемаларды ашық көтерді.

Оның айтуынша, тұрғын үй бөлу барысында жүйелі заңбұзушылықтар тіркелген.

Депутат дерегінше, бүгінде ел бойынша баспана кезегінде шамамен 61 мың жетім бала тұр. Оның 43 мыңнан астамы кәмелет жасына толғанына қарамастан, әлі күнге дейін үй ала алмаған. Ең ауыр жағдай Алматы облысы, Шығыс Қазақстан облысы, Қарағанды облысы, Қостанай облысы және Ақтөбе облысы өңірлерінде тіркелген.

Бұл аймақтарда мыңдаған жетім бала баспанаға қол жеткізе алмай отыр. Статистика жағдайдың қаншалықты күрделі екенін көрсетеді:

ел бойынша берілген 60 мың пәтердің тек 7 мыңы ғана жетім балаларға тиген.

Ең сорақысы, кей өңірлерде жетім балаларға арналған пәтерлерде бөтен адамдардың тұрып жатқаны анықталған. Сонымен қатар ақпараттық жүйелерді көшіру кезінде деректердің жоғалуы секілді фактілер тіркелген. Депутаттың сөзінше, нақты нәтиже көбіне тек бақылаушы органдар араласқанда ғана байқалады. Бұл жүйенің өздігінен жұмыс істемейтінін көрсетеді.

Мәселені шешу үшін ол Қазақстан Республикасының Оқу-ағарту министрлігі, Қазақстан Республикасының Еңбек және халықты әлеуметтік қорғау министрлігі және жергілікті атқарушы органдарға нақты көрсеткіштері мен жауапты тұлғалары бар жол картасын әзірлеуді ұсынды.

Сонымен қатар тұрғын үй бөлу процесіне қатаң бақылау енгізіп, белгіленген квоталарды сақтамаған лауазымды тұлғалардың жеке жауапкершілігін бекіту қажеттігін айтты.

Дереккөз: smartnews.kz