Елімізде алғаш рет қатерлі ісікке қарсы жасалған дәрі жыл соңына дейін тіркеуге алынады. Бұл туралы ғылым және жоғары білім министрі Саясат Нұрбек баяндап берді,деп хабарлады tiek.kz.
Министрдің айтуынша, алғашқы нәтижелері жаман емес. Жан-жақсы сынақтан сәтті өткен. Жыл соңына дейін тіркеуге алынып, өндіріске жіберіледі.
«Өткен жылы бірінші деңгейдегі клиникалық сынақтарды аяқтадық. Сынақ өте сәтті болды. Сонымен қатар қазіргі таңда Қазір біз жұмыс істейтін емделушілер қатары да кеңейтіліп жатыр. Яғни емделушілер қатерлі ісіктің барлық түрі бойынша тексеріліп жатыр. Былтыр тек тоқ ішек қатерлі ісігіне қатысты болса, қазір қатерлі ісіктің барлық түрі бойынша жұмыстар жасалып жатыр. Бұйырса, осы жылдың соңына дейін дәріні тіркеп, нарыққа шығуды жоспарлап отырмыз. Нәтижелер өте жақсы әрі тұрақты. Көптеген пациенттердің реакциясы жақсы», — дейді ол.
Министрдің айтуынша, қатерлі ісіктердің көлемі орта есеппен 30 пайызға азайған.
«Арнайы процедура бойынша осы препаратты өз бетінше сынауға қатысқан науқастарда ремиссия басталды. Осы жылдың соңына дейін барлығын жинап, бөлек баспасөз мәслихатын өткізіп, ресми түрде таныстырамыз», — деп түсіндірді Саясат Нұрбек үкімет үйінде өткен баспасөз мәслихатында.
