«Өлім жазасына да дайынмын»: Сұлтан Сәрсемалиев сотта сөз сөйледі
Сәрсемалиевтің айтуынша, жанжал отбасылық келіспеушіліктер мен жұбайының туыстарының араласуы салдарынан басталған.
Төрт адамды өлтірді деген басты күдікті – 29 жастағы Сұлтан Сәрсемалиев қылмысқа ұзаққа созылған отбасылық жанжал мен психологиялық қысым себеп болғанын айтты, деп хабарлады Tengrinews.kz.
Алдын ала тыңдау барысында сотталушы мәлімдеме жасап, жанжал туралы өз нұсқасын баяндады. Айта кетейік, Сұлтан Сәрсемалиев қаза тапқандардың күйеу баласы болған.
«Мен жасаған қылмысым үшін жауапкершілікке, кез келген жазаға – мейлі ол өлім жазасы немесе өмір бойына бас бостандығынан айыру болсын, дайынмын. Барлық әрекетімнің басты себебі – некемді бұзуға бағытталған өзіме және отбасыма қатысты қылмыстық қолсұғушылықтарға қасақана жауап бергенім деп есептеймін», — деді сотталушы.
Сәрсемалиевтің айтуынша, жанжал отбасылық келіспеушіліктер мен жұбайының туыстарының араласуы салдарынан басталған.
«Әйеліммен 10 жыл бірге тұрдық. Егер арамызда үлкен келіспеушіліктер болса, бес баламыз болмас еді және сонша уақыт бірге тұрмас едік. Алайда әйелімнің отбасы біздің қарым-қатынасымызға шектен тыс әрі негізсіз араласып, әйелім екеуміздің арамызға іріткі салды», — деді сотталушы.
Сәрсемалиевтің айтуынша, жанжалдарға қарамастан, ол әйелімен бірге тұруды жалғастырған, бірақ оның сөзінше, жұбайының туыстары тарапынан қысым тоқтамаған.
«Олар балалар «не менімен, не менің ата-анаммен тұрмайды» деді. Осылайша балаларымды пайдаланып, мені іс жүзінде бопсалады», — деді ол.
Оның айтуынша, жиналып қалған жағдайлар қатты эмоционалдық және психологиялық қажуға әкеп соқтырған.
«Мен балаларымды анасынан да, әкесінен де, туған әжесінен де айырғым келмеді… Бірақ соңында отбасымды сақтап қалуға тырысқан барлық әрекетім нәтиже бермеді. Олардың іс-әрекеттері мен сөздері мені өзімді ұстай алмайтын күйге жеткізді, моральдық және психологиялық тұрғыдан қажыдым, бұл менің адами қалпымды бұзды. Осыдан кейін мен бұл қылмысты жасадым», — деді айыпталушы.
