Қазақстанда АЭС туралы ақпараттар мемлекеттік құпияға жатқызылуы мүмкін

«Жылу электр орталықтары мен мемлекеттік аудандық электр станцияларына қатысты деректердің басым бөлігі қоғам үшін толық ашық күйінде қалады. Энергетикалық жобалар бойынша біз ешқашан ешқандай құпия ұстаған емеспіз. Атом станциясы бойынша мұндай ықтималдық бар, өйткені бұл өте ірі жоба, үкіметаралық келісім жасалуы мүмкін. Бірақ бұл мәселе бойынша Атом энергиясы жөніндегі агенттіктегі әріптестеріміздің өздері егжей-тегжейлі жауап беретін шығар», – деді Есімханов.

Дегенмен белгілі бір ерекшеліктерге байланысты құпиялылық саясаты болуы мүмкін екенін жоққа шығармады. Энергетика министрлігінің құзыретіне кіретін ақпарат қазақстандықтар үшін ашық әрі қолжетімді болып қалатынына сендірді.

«Біздің жобалар бойынша ештеңені жасырған жоқпыз, аукциондар өтіп жатыр… Қазіргі кезеңде біз оны құпияландыруды (ақпаратты құпия етуді. – Ескертпе) жоспарлап отырған жоқпыз», – деп қосты вице-министр.