Алматыда имам сауат ашу курсына келген балаларды сабаған
Оның сыныптағы жасөспірімдерді ұрып, қамшыға ұқсас затпен аяусыз сабағанын анық көруге болады.
Алматы облысы Қарасай ауданындағы «Түркістан-1» мешітінде діни сауат ашу курсына келген жасөспірімдерді аяусыз ұрып-соққан оқытушы жұмыстан шығарылды, деп хабарлайды Ertenmedia.kz.
Қазақстан мұсылмандары діни басқармасы оқиға маусым айының басында «Имани жаз» сабақтары кезінде болғанын мойындады. Мүфтияттың түсіндіруінше, оқушылар өзара кикілжіңге түскенде, оқытушы Дүйсехан Нұрберді оларды тәртіпке шақырмақ болып, «эмоцияға беріліп, педагогикалық әдепке сай келмейтін әрекетке жол берген».
Оқиға желіге тарағаннан кейін мешітте шұғыл жиын өтіп, ұстаз кінәсін мойындап, ата-аналардан кешірім сұраған.
Ашығын айтқанда, бала құқығы аяққа тапталған мұндай ауыр фактіні «ата-ана кешірді» немесе «эмоцияға берілді» деген сөзбен жылы жауып қою өте қауіпті үрдіс. Мешіт қабырғасындағы зорлық-зомбылыққа тек тәртіптік шара емес, құқық қорғау органдары тарапынан да нақты құқықтық баға берілуі керек.
