Елордада жеңіл рельсті көлік (LRT) жүйесінің жаңа атауы мақұлданды. Бұл туралы қалалық мәслихаттың кезектен тыс сессиясында Тілдерді дамыту және архив ісі басқармасы басшысының орынбасары Досжан Исабек мәлімдеді, деп хабарлады tiek.kz.
Оның айтуынша, әкімдікке қала тұрғындарынан, қоғамдық ұйымдардан және Қазақстан Жазушылар одағының қалалық филиалынан жақында ашылатын жеңіл рельсті көлік жүйесіне өзіндік атау беру туралы ұсыныстар түскен. Исабек атап өткендей, LRT біртіндеп Астананың қоғамдық көлігінің басты желілерінің біріне айналып келеді, сондықтан жобаны тек инженерлік-техникалық атаумен шектеп қоймау туралы шешім қабылданған.
«Жобаға тұрғындар оңай айтып, есте сақтай алатын заманауи өзіндік атау беру керек деген пікір бар. Қазіргі уақытта LRT атауы ресми түрде қолданылғанымен, күнделікті өмірде оның мазмұндық және мақсаттық мәні жоқ. Халықаралық тәжірибеде ірі көлік жүйелеріне көбіне қаланың тіліндегі, оның мәдениеті мен келбетіне бейімделген қысқа әрі өзіндік атаулар беріледі», – деп түсіндірді спикер.
Мысал ретінде Исабек Ванкувердегі Skytrain, Рио-де-Жанейродағы SuperVia, Ресейдегі «Сапсан» және Өзбекстандағы Afrosiyob поездарын келтірді. Оның айтуынша, мұндай атаулар тек көлік жүйесінің белгісі ғана емес, сонымен қатар қала мен елдің танымал бейнесінің бір бөлігіне айналады.
Қалалық ономастикалық комиссия заманауи халықаралық форматқа, ұлттық рухқа сай келетін және мобильді қосымшаларда, карталарда, навигациялық жүйелерде және БАҚ-та қолдануға ыңғайлы бірнеше атау нұсқаларын қарастырды. Ұсыныстардың арасында «Сұңқар», «Лашын», «Құлан», «Аспан», «Тарлан» және өзге де нұсқалар болды.
Нәтижесінде комиссия мүшелері «Тарлан Астана» атауын бірауыздан қолдады.
Бастама авторларының пікірінше, «Тарлан Астана» атауы елорданың халықаралық деңгейде танылуын айқындайды, оңай айтылады әрі тез есте сақталады, сонымен бірге заманауи көлік жүйесінің қарқынын көрсетеді. Бұдан бөлек, бұл атау туристер мен шетелдік қонақтар үшін де түсінікті әрі ыңғайлы болуы тиіс.
