Құрылтай сайлауы: Алматыда 6 мың тәуелсіз байқаушы арнайы дайындықтан өтті

Бұл туралы Алматы қаласының Қоғамдық коммуникациялар орталығында өткен брифингте «Дауыс» қоғамдық байқаушылар коалициясының өкілдері мәлімдеді.

Байқаушы болуға қызығушылық жоғары

«Дауыс» коалициясының Алматы қаласындағы филиал жетекшісі Диана Малаеваның айтуынша, биыл тәуелсіз байқаушы болуға ниеттілер қатары көп. Күн сайын оқу-жаттығуға 300-ден 700-ге дейін адам қатысқан.

Ұйымдастырушылар қаладағы барлық сайлау учаскелерін тұрақты байқаушылармен қамтамасыз етуді көздеп отыр. Дайындықтан өткендердің арасында бұған дейінгі сайлау науқандарында тәжірибе жинақтаған азаматтар да, жаңа қатысушылар да бар.

Практика, жасанды интеллект және фактчекинг

Биылғы оқыту барысында теориямен қатар практикалық дайындыққа ерекше көңіл бөлінді. Болашақ байқаушылар сайлау учаскелеріне барып, жұмыс барысымен танысты. Сонымен қатар ерекше қажеттіліктері бар азаматтарға жасалған жағдайлар да назардан тыс қалмады.

«Social Project Management орталығы» ҚҚ өкілі Ержан Серікұлының сөзінше, бағдарлама байқаушылардың дауыс беру күні тікелей кездесуі мүмкін нақты жағдайларына негізделген:

«Теориялық бөліммен қатар, нақты жағдайларды талқылап, ақпаратты дұрыс тіркеу және өз әрекеттерінің алгоритмін түсіну бойынша практикалық жұмыстар жүргіздік. Заманауи бағдарлама цифрлық бағытты, жасанды интеллект құралдарымен жұмыс істеуді және медиадағы дайындықты да қамтиды».

Байқаушы нені білуі тиіс?

Оқу барысында қатысушылардың мынадай дағдылары жан-жақты пысықталды:

• Фактчекинг және ақпаратпен жұмыс: Ақпарат көздерін тексеру, цифрлық құралдарды дұрыс пайдалану және тексерілмеген (фейк) мәліметтердің таралуына жол бермеу.

• Әрекет ету алгоритмі: Учаскенің ашылуынан бастап дауыс беруді бақылау, заң бұзушылықтарды дұрыс тіркеу және комиссия төрағасына жүгіну тәртібі.

• Медиа-сауаттылық: Фото, аудио және бейнетіркеудің заңды ережелері.

• Дағдарысты басқару: Жанжалды жағдайларда байқаушының өзін ұстау әдебі. Негізгі қағида – байқаушы өз құқықтарын біліп қана қоймай, заңдағы шектеулерді сақтауы және сайлау комиссиясының жұмысына араласпауы тиіс.

«Кешенді тәсіл байқаушыны тек теориялық біліммен ғана емес, практикалық дағдылармен де қаруландырады. Басты міндет – Алматы қаласын сапалы дайындықтан өткен байқаушылармен қамтамасыз ету», — деп түйіндеді Ержан Серікұлы.

Естеріңізге сала кетейік, Құрылтай сайлауы 23 тамыз күні өтеді.