«Жетінші арна» сайлауалды дебат барысында өткен онлайн дауыс берудің аралық қорытындысын жариялады

Қазіргі сәтте дебаттың кезекті кезеңі өтіп жатыр: партия өкілдері өздерінің сайлауалды бағдарламаларын таныстырып қана қоймай, бір-біріне сұрақ қойып, мемлекеттік саясаттың өзекті мәселелері мен оларды іске асыру тетіктері бойынша пікір таластыруда.

Партиялардың білім саласына қатысты ұстанымдары қандай?

Тікелей эфир барысында саяси ұйым өкілдері білім беру жүйесіне қатысты мынадай бастамалар көтерді:

• «Әділет» партиясы (Рауан Кенжеханұлы): Білім беруді цифрландыруға басымдық берді. Партия жасанды интеллектіні білім жүйесіне енгізуді, жеке деректерді қорғауды ұсынады. Ең басты мақсат — алдағы 5 жыл ішінде 5 миллион қазақстандықты цифрлық технологиялар мен жасанды интеллект дағдыларына оқыту.

• Respublica партиясы (Мейрамгүл Мәдәлі): Жоғары білімнің халықаралық бәсекеге қабілеттілігін арттыруға тоқталды. Олар шетелдік талапкерлерге арналған цифрлық қабылдау жүйесін енгізуді, қос дипломды бағдарламаларды көбейтіп, ЖОО-лардың академиялық еркіндігін кеңейтуді ұсынды.

• ЖСДП (Мақсұт Насибулов): Жоғары білімнің қолжетімділігін жақтады. Партия өкілі ЖОО-ларда тегін білім берудің популизм еместігін, бұл Еуропа елдерінде сәтті жұмыс істеп тұрған тәжірибе екенін айтып, білім алу мүмкіндігі отбасының қалтасына тәуелді болмауы тиіс екенін қадап айтты.

• Қазақстанның Халық партиясы (Бейбіт Құсайынов): Білікті жұмысшы кадрлардың тапшылығын жою үшін колледждерді бейінді жеке компаниялардың сенімгерлік басқаруына беруді ұсынды. Бұл студенттердің өндірістік тәжірибеден өтіп, оқу бітірген соң бірден жұмысқа орналасуына жол ашпақ.

• «Ауыл» партиясы (Шахмардан Байманов): «Дипломмен – ауылға» бағдарламасының орындалуына қатаң бақылау орнатуды талап етті. Сонымен қатар, ауылдық квотамен оқыған түлектер міндетті түрде туған ауылдарына барып еңбек етуі тиіс деген ұстанымын білдірді.

• «Ақ жол» партиясы (Дулат Тастекей): Педагогтердің мәртебесіне назар аударып, олардың еңбек жағдайын жақсарту және жалақысын арттыру бағытындағы заңнамалық бастамаларын алға тартты.

• «Байтақ» партиясы (Аслан Байзаханов): Экологиялық мәдениетті балабақшадан бастап мемлекеттік басқару жүйесіне дейін үздіксіз сіңіру қажеттігін атап өтті. Партия осы күнге дейін 150 мыңнан астам адамды қамтыған экологиялық сауаттылық бағдарламасын іске асырғанын еске салды.

Көрермен таңдауы: Кімнің сөзі өтімді?

Теледебаттың басты ерекшелігі — көрермендердің тікелей эфир барысында экрандағы QR-код арқылы «Қай партия өкілінің сөзі өтімді?» деген сауалға жауап беріп, өз таңдауын жасауы.

Қазіргі уақытқа дейін онлайн дауыс беруге 30 842 көрермен қатысып үлгерді. Алғашқы кезеңдердің қорытындысы бойынша көш басында «Әділет» партиясы тұр.

Онлайн дауыс берудің аралық нәтижелері (пайыздық көрсеткіштің кему ретімен):

Онлайн дауыс беру тікелей эфир аяқталғанға дейін жалғасады. Дебаттың соңғы және ресми қорытынды нәтижелері бағдарлама соңында жарияланатын болады.