Өскемендегі «Казцинк» зауытында болған апат салдарынан екі адам қаза тапқаны белгілі болды.
Болжам бойынша, оқиға түтінсорғышты тазалау кезінде болған. Қазір мән-жайы анықталып, тиісті органдар тергеу жүргізіп жатыр.
Бұған дейін Өскемендегі «Казцинк» зауытында болған жарылыстан 9 адам зардап шеккені айтылған еді. Шығыс Қазақстан облыстық денсаулық сақтау басқармасының мәліметінше, зардап шеккендердің екеуінің жағдайы ауыр.
Жарылысқа қатысты тергеуді Премьер-Министр Олжас Бектенов жеке бақылауына алды.
Үкімет басшысы Төтенше жағдайлар министрлігі, Экология министрлігі және облыс әкімдігіне нақты тапсырмалар беріп, жағдай бойынша толық есеп ұсынуды талап етті.
