«Жастардың білім алу мүмкіндігі шектеліп жатыр»: депутат оңтүстікте жоғарғы оқу орындары жетпей жатқанын айтып дабыл қақты
Еліміздің оңтүстік өңірлеріндегі жоғары білімнің қолжетімділігі мәселесі қайтадан күн тәртібіне шықты. Мәжіліс депутаты Олжас Құспеков осы мәселеге назар аударуды сұрап, мәселе көтерді, деп хабарлайды tiek.kz.
Депутаттың айтуынша, халық саны тұрақты өсіп келе жатқанына қарамастан, Шымкент пен Түркістан облысы университеттер мен білім беру бағдарламаларының тапшылығын әлі де сезініп отыр.
«Бүгінде халық саны 3,3 миллионнан асатын бұл өңірде шамамен 10 жоғары оқу орны бар. Салыстырмалы түрде алғанда, Астанада — 20-ға жуық, ал Алматыда — 30-ға жуық университет жұмыс істейді. Мұндай бірнеше есе айырмашылық жастардың білім алу мүмкіндігіне тікелей әсер етуде: жыл сайын мыңдаған түлек сапалы білім іздеп, өз өңірінен кетуге мәжбүр.
Депутаттың айтуынша, басты мәселелердің бірі — мамандықтар бағыттарының шектеулілігі. Әсіресе инженерия, технология және инфрақұрылымды басқару салаларында білім беру бағдарламаларының жетіспеушілігі қатты байқалады. Бұл салалар қазіргі экономиканың негізін құрайды.
«Шымкентте ауқымды инфрақұрылымдық жобалар жүзеге асырылып жатыр, соның ішінде авиациялық бағыттың дамуы және әуежайды жаңғырту жұмыстары бар. Бұл білікті инженерлер мен техникалық мамандарға сұраныстың одан әрі артатынын білдіреді. Алайда негізгі мәселе де осында: экономика кадрларға мұқтаж, ал білім беру жүйесі оларды жеткілікті деңгейде дайындап жатқан жоқ», — деп жазған депутат әлеуметтік желідегі парақшасында.
Сонымен қатар, оңтүстік өңірлердегі демографиялық өсім жоғары білімге деген сұраныстың алдағы уақытта да арта түсетінін көрсетіп отыр. Аймақ елдегі ең қарқынды өсіп келе жатқан өңірлердің бірі болып саналады, бұл өз кезегінде бар білім беру инфрақұрылымына түсетін жүктемені күшейтеді.
Мемлекет басшысы Қасым-Жомарт Тоқаев бұған дейін халықаралық білім беру ынтымақтастығын дамыту және шетелдік университеттердің филиалдарын ашу мәселесін басым бағыт ретінде атап өткен болатын. Алайда халық саны ең көп өңір әзірге бұл бастамалардан тыс қалып отыр.
Осыған байланысты Олжас Құспеков Үкіметке жүйелі шаралар қабылдау жөнінде ұсыныс жолдады. Ұсыныстар қатарында:
- Шымкент пен Түркістан облысында жекеменшік жоғары оқу орындарының дамуын ынталандыру;
- өңірде халықаралық білім беру кластерін құру;
- шетелдік университеттер мен оқытушыларды тарту;
- инженерлік және технологиялық бағыттар бойынша бағдарламаларды дамыту.
Сарапшылар бұл мәселе нүктелік шешімдермен емес, кешенді тәсілді талап ететінін атап өтті. Жоғары білім жүйесінің дамуы елдің бәсекеге қабілеттілігіне және адами капиталдың ел ішінде сақталуына тікелей әсер етеді.
