«Құдағиына үйленіп алған»: «ұлдарымнан қорлық көрдім» деген қарияға қатысты оғаштау ақпарат шықты
Қарияның жұбайы әлеуметтік желіде жауап беріп, айтылған мәліметтердің шындыққа жанаспайтынын айтыпты.
Жетісу облысында бұған дейін балаларынан қысым көріп жүргенін айтып, көмек сұраған ер адамның мәлімдемесіне қатысты жаңа деректер пайда болды, деп хабарлайды Democrat.kz сайты.
Еске салайық, бұған дейін Бақытбек есімді азамат балалары өзінен ақша талап етіп, бермеген жағдайда күш көрсететінін, тіпті аязды күні далаға тастап кеткенін айтып, құқық қорғаушылардан көмек сұраған еді.
Алайда бұл жағдайға байланысты оның жұбайы әлеуметтік желіде жауап беріп, айтылған мәліметтердің шындыққа жанаспайтынын мәлімдеді.
«Өтірік айтып отыр. Балалары оған себепсіз тиіспейді. Мен Бақытбектің некелі әйелімін. Бақытбек балаларым сабайды деп өтірік айтып отыр. Балалардың оған реніші бары рас. Себебі Бақытбек өзінің туған құдағиына үйленген.
Балалар содан намыстанып, оған реніштерін білдіріп, сөйлейтіні рас. Өзінің туған құдағиына үйленген адамды кім сыйласын», – деп жазды ол.
Осылайша, отбасы ішіндегі жағдайға қатысты екі түрлі пікір айтылып отыр. Қазіргі уақытта бұл мәселеге байланысты ресми органдар тарапынан нақты түсініктеме берілген жоқ.
