«Өкінемін, емделу керек»: Рэпер Qarakesek есірткі пайдаланғанын мойындады
Сонымен қатар, әнші психиатрлық емдеуден өтуі тиіс, ем амбулаториялық және мәжбүрлі түрде жүргізіледі.
Ақтөбе қалалық сотында Омар Амантаев (Qarakesek лақап атымен танымал) өз кінәсін мойындады.
Ол Қылмыстық кодекстің 293-бабы 3-бөлігі және 296-бабы 3-бөлігі бойынша сотталды.
Сот мәліметтері бойынша, 2025 жылғы 30 тамызда Амантаев есірткілік масаң күйде көлік басқарған және одан жалпы салмағы 0,26 грамм психотропты зат – мефедрон табылған. 4 қыркүйектегі сараптама ақ түсті заттың мефедрон екенін растады.
Сот отырысында әнші «Кінәмді толық мойындаймын, айыппен келісемін. Сату мақсаты болмады. Емделу керек болып жүр. Өкінемін. Айыппұл жазасын сұраймын», – деп кешірім сұрады.
Прокурор айыппұл тағайындауға негіз жоқ деп санап, 100 сағат қоғамдық жұмысқа тарту жазасын ұсынды.
Сот шешімі бойынша, Омар Амантаев Қылмыстық кодекстің 296-бабы 3-бөлігі бойынша кінәлі деп танылып, 100 сағат қоғамдық жұмысқа тартылды.
Жергілікті атқарушы орган оны тегін пайдалы жұмысқа бағыттайды, ал қоғамдық жұмысқа қатыспаған жағдайда 4 сағаты үшін 1 тәулікке қамаққа алынуы мүмкін.
Сонымен қатар, әнші психиатрлық емдеуден өтуі тиіс, ем амбулаториялық және мәжбүрлі түрде жүргізіледі.
