Тағы да жемқорлық: Ақтөбеде Әуе қорғанысы күштері әскери институтының басшылары қамауға алынды
Ақтөбеде Талғат Бигелдинов атындағы Әуе қорғанысы күштері әскери институтының басшылары сыбайлас жемқорлыққа күдікті ретінде ұсталды. Іс бойынша оқу орнының бастығы, авиация генерал-майоры Тимур Еспағанбетов пен оның орынбасары, авиация полковнигі Расул Исаходжаев күдікке ілінді, деп хабарлайды Tizgin.kz порталы Hronika.kz басылымына сілтеме жасап.
Генерал-майор пара алды деген күдікке ілінді
Басылымның мәліметінше, Тимур Еспағанбетовті Ақтөбе облысы бойынша Экономикалық тергеп-тексеру департаментінің қызметкерлері ұстаған. Әскери институт бастығы елеулі мөлшерде пара алды деген күдікке ілінді. Іс Қазақстан Республикасы Қылмыстық кодексінің 366-бабы 2-бөлігі бойынша тергеліп жатыр.
Авиация генерал-майоры Ақтөбе қалалық полиция басқармасының уақытша ұстау изоляторына қамалды. Әзірге болжамды параның нақты сомасы мен оны алу мән-жайлары жарияланған жоқ.
Институт бастығының орынбасары да ұсталды
Hronika.kz мәліметінше, іс бойынша екінші күдікті – әскери институт бастығының орынбасары, авиация полковнигі Расул Исаходжаев. Ол Қазақстан Республикасы Қылмыстық кодексінің 367-бабы 2-бөлігі бойынша елеулі мөлшерде пара берді деген күдікке ілінген.
Алдын ала мәлімет бойынша, тергеліп жатқан сыбайлас жемқорлық құқық бұзушылықтары коммерциялық компаниялардың бірінің өкілдерімен байланысты болуы мүмкін. Алайда болжамды жемқорлық схемасының егжей-тегжейі мен күдіктілердің әрқайсысының қандай рөл атқарғаны әзірге нақтыланбады. Тергеуге қатысты өзге мәліметтер жарияланған жоқ.
Ақтөбедегі әскери институт туралы не белгілі
Екі мәрте Кеңес Одағының Батыры Талғат Бигелдинов атындағы Әуе қорғанысы күштерінің әскери институты Ақтөбе қаласында орналасқан. Бұл – Орталық Азиядағы Қарулы күштер мен басқа да күштік құрылымдарға авиация мамандарын даярлайтын жалғыз жоғары әскери оқу орны. Институт Қазақстанның әскери авиация бөлімшелеріне қажетті кәсіби мамандарды даярлайды.
Оқу орнын авиация генерал-майоры Тимур Еспағанбетов басқарады. Қорғаныс министрлігі жариялаған өмірбаяндық мәліметтерге сәйкес, ол Ақтөбе жоғары әскери авиациялық училищесін, Ресейдің Әскери-әуе академиясын және Ресей Федерациясы Қарулы күштері Бас штабының Әскери академиясын тәмамдаған.
Айта кетейік, Қазақстан заңнамасына сәйкес, соттың заңды күшіне енген айыптау үкімі шыққанға дейін күдіктілер кінәсіз деп есептеледі.
