Қорғас арқылы Қытайға 620 ақбөкен мүйізін заңсыз алып өтпек болғандардың жолы кесілді

Еліміздің табиғи байлығын шетелге заңсыз шығармақ болған топтың жолы кесілді.

20 қазан күні ҰҚК Шекара қызметі «Қорғас» халықаралық орталығында Қытайға өткелі тұрған үлкен жүкке тосқауыл қойды.

Тексеру барысында ешқандай рұқсат құжаттары жоқ 620 дана ақбөкен мүйізі табылған. Алдын ала есептеулер бойынша, бұл дериваттардың қара нарықтағы бағасы шамамен 180 миллион теңгені құрайды.

«Қазіргі уақытта осы факті бойынша барлық материалдар тиісті шешім шығару үшін құзыретті органдарға өткізілді. Қылмыстық-процестік кодекстің 201-бабының 1-бөлігіне сәйкес өзге ақпарат жария етуге жатпайды. ҰҚК Шекара қызметі Мемлекеттік шекарада құқыққа қайшы әрекеттердің жолын кесу бойынша жұмысты жалғастыруда», — делінген хабарламада.