Печенье ішіндегі есірткі: ІІМ Астанадағы ірі есірткі дүкенінің қызметін тоқтатты

Қазақстанның Ішкі істер министрлігі елордада есірткі сатумен айналысқан «Пепе» интернет-дүкенінің қатысушыларын құрықтады. Тінту барысында есірткі қосылған 238 дана печенье мен 12 келіге жуық түрлі есірткі заттары тәркіленді, деп хабарлайды Tiek.kz.

«Пепе» интернет-дүкені қалай жұмыс істеген?

Жедел-іздестіру іс-шараларының нәтижесінде полиция Мемлекеттік күзет қызметімен бірлесіп, жалдамалы пәтерлерде 30 жастан асқан бес ер адамды ұстады. Тергеу мәліметтеріне сүйенсек, бұл қылмыстық топ нақты иерархия бойынша жұмыс істеген: «ұйымдастырушы – буып түюші – қоймашы – есірткі жасырушы». Олар тәулік бойы клиенттерін марихуана, гашиш, каннабис шайыры және басқа да каннабис тобындағы есірткілермен қамтамасыз етіп отырған.

Ерекше «ассортимент»: Есірткі қосылған печеньелер

Бұл қылмыстық топтың ұсынған тауарларының ішінде ерекше назар аударатыны – каннабис шайыры қосылған печеньелер.

«Ұсынылған ассортиментте каннабис шайыры салынған печеньелер болған. Әрқайсысының салмағы 100 граммнан болатын 238 дана ерекше кондитерлік өнім тәркіленді», – делінген ресми хабарламада.

Күдіктілердің тұрғылықты жерін тінту барысында жалпы салмағы 12 келіге жуық есірткі табылған. Оның ішінде:

• 8 келіден астам марихуана;

• 1,5 келі гашиш;

• 2 келі каннабис шайыры бар.

Сонымен қатар, пәтерлерден ірі көлемде қолма-қол ақша, банк карталары, ұялы телефондар, электронды таразылар, вакуумдау мен өлшеп-орауға арналған арнайы құрылғылар және басқа да заттай дәлелдемелер тәркіленген.

Қылмыстық іс және жаза

ІІМ Есірткі қылмысына қарсы іс-қимыл комитетінің басқарма бастығы Бақытжан Әмірхановтың айтуынша, қазіргі уақытта ұсталған азаматтарға қатысты ҚР Қылмыстық кодексінің 297-бабы бойынша сотқа дейінгі тергеп-тексеру жұмыстары басталды. Барлық күдіктілер қамауға алынған.

Министрлік алдағы уақытта да есірткі бизнесін ұйымдастырушылар мен есірткі жеткізу арналарына қарсы мақсатты күресті жалғастыратынын мәлімдеді.

(Дереккөз: Polisia.kz)