Маңғыстаудағы трагедия: Күдікті лауазымды тұлғалар анықталып, зардап шеккендерге арнайы қор ашылды

ҚР Премьер-Министрінің орынбасары Қанат Бозымбаевтың төрағалығымен өткен Үкіметтік комиссия отырысында Маңғыстаудағы төтенше жағдайдың алғашқы тергеу нәтижелері жарияланды. Жауапты тұлғаларға қатысты қылмыстық іс қозғалып, қаза тапқандардың отбасыларына көмек көрсету жұмыстары басталды, – деп хабарлайды Tiek.kz.

Екі бап бойынша қылмыстық іс қозғалды

ҚР Ішкі істер министрінің орынбасары Санжар Әділовтің мәліметінше, қайғылы оқиғаға қатысты Қылмыстық кодекстің екі бабы бойынша іс қозғалған:

• 453-баптың 2-бөлігі – «Ауыр зардаптарға әкеп соққан қызметке салғырт қарау»;

• 465-бап – «Кеме жүргізу қағидаларын бұзу».

«Тергеу барысында әскери қызметшілердің қауіпсіздігін қамтамасыз етуге, оқу-жаттығуларды ұйымдастыруға және құтқару іс-шараларын жүргізуге байланысты заң бұзушылықтарға жол берді деген күдікке ілінген лауазымды тұлғалар анықталды. Олардың іс-әрекеттеріне құқықтық баға беріледі», – деді Санжар Әділов.

Құтқарылған сарбаздың жағдайы қалай?

Жиында оқиғадан аман қалған әскери қызметшінің денсаулығы да жеке қаралды. Денсаулық сақтау вице-министрі Манас Рамазановтың айтуынша, қазіргі уақытта сарбаздың жағдайы тұрақты, өміріне қауіп төніп тұрған жоқ. Ол есін жиып, барлық қажетті медициналық көмекті толық алып жатыр. Сарбаздың қасында ата-анасы бар.

Арнайы қор және абсолютті ашықтық

Отырыс барысында қаза тапқан және зардап шеккен әскери қызметшілердің отбасыларына жан-жақты қолдау көрсету бойынша нақты тапсырмалар берілді. Бұл бағытта мынадай шаралар қабылдануда:

• Заңда белгіленген мемлекеттік төлемдер мен өтемақылардан бөлек, бизнес өкілдері мен меценаттар тарапынан қаржылық қолдау көрсетіледі;

• Қаражатты бір жерге шоғырландыру үшін арнайы қор ашылды;

• Түскен қаражатты бөлудің абсолютті ашықтығы қамтамасыз етіледі.

Аталған қордың қызметі мен қаражаттың үлестірілуін Маңғыстау облысының әкімдігі тұрақты бақылауға алды.