Туыстарының көз жұмғанын білмейді: Ақбаян балаларымен қауышты (ВИДЕО)
Ол әкесі мен анасының, ағасы мен апасының қайтыс болғанын білмейді.
Атыраудағы ауыр қылмыстық оқиғадан кейін психикалық денсаулық орталығында ем қабылдаған Ақбаян Мұқанғалиева ауруханадан шықты. Қазір ол жақындарының қарауында. Соңғы уақытта балаларына барып, олармен қайта қауышып жүр.
Қазір Ақбаянның денсаулығын қалпына келтірумен қатар, қалыпты өмірге қайта бейімделуіне басымдық беріліп отыр. Ол әлеуметтену мақсатында түрлі оңалту орталықтарына барып, қажетті сауықтыру шараларынан өтуде.
Ақбаянның апасы Д.-ның айтуынша, сіңілісінің қазіргі жағдайы жақсы. Үйге шыққаннан кейін өзін біршама жақсы сезініп жүр. Дегенмен, толықтай қалыпқа келіп, күнделікті өмірге қайта бейімделуі үшін әлі де уақыт қажет.
– Қазір Ақбаянның жағдайы жақсы. Үйге шықты. Өзін жақсы сезінеді. Ендігі жерде толықтай қалыпқа келуі үшін уақыт қажет. Сауықтыру, емдеу жұмыстарын жалғастырып жатырмыз. Адамның осындай жағдайдан кейін қайта аяққа тұрып, өмірге бейімделуі оңай емес. Сондықтан оған жақындарының қолдауы да маңызды, – дейді Д.
Апасының сөзінше, Ақбаянның оңалтуы тек медициналық еммен шектелмейді. Оның қайтадан қоғамға араласуы, күнделікті тіршілікке бейімделуі де маңызды. Осы мақсатта түрлі оңалту орталықтарына барып жүр. Дегенмен, ем-дом мен сауықтыру шараларына қажетті қаржы да керек.
– Бұл бір күнде аяқталатын шаруа емес. Адамның қайта аяққа тұрып, өмірге бейімделуі үшін уақыт керек. Оған емдеу, сауықтыру жұмыстары қажет. Мұның бәріне қаржы да керек. Қазір қолдан келгенше жағдай жасап жатырмыз, – дейді ол.
Қазір Ақбаян немере апасының (әкесінің ағасының қызы) үйінде тұрып жатыр. Жақындарының қарауында. Балаларына барып, олармен кездесіп жүр. Балаларының жанында болуы оның көңіл күйіне де жақсы әсер етіп отырғанға ұқсайды. Алайда Ақбаянның өміріндегі ең ауыр шындықтың бірі әзірге өзіне айтылған жоқ. Ол әкесі мен анасының, ағасы мен апасының қайтыс болғанын білмейді. Бұл – жақындары үшін де аса ауыр мәселе.
Апасы Д. сіңлісінің денсаулығын ескеріп, болған жағдайды әзірге айтпай отырғандарын жеткізді. Ақбаянның жағдайы біршама тұрақталып, өзін жақсы сезіне бастаған соң, бұл қайғылы хабарды естіртуді жоспарлап отыр.
Оқиғаның ауырлығын ескерсек, мұндай жаңалықты адамның психологиялық жағдайына зиян келтірмей жеткізу оңай болмасы анық. Сондықтан жақындары оның қашан және қалай білетініне ерекше мән беріп отыр.
Қазір отбасы үшін тағы бір өзекті мәселе – баспана. Ақбаянның басты тілегі – балаларының қасында болу. Бүгінде олармен кездесіп жүргенімен, болашақта балаларын өз қасына алып, бір шаңырақ астында тұрғысы келеді.
Осы ретте жақындары «Харекет» қоры көмек қолын созып, Ақбаянның баспана алуына жәрдемдессе деген үмітте.
– Балаларын қатты сағынады. Ең үлкен тілегіміз – Ақбаянның толықтай қалыпқа келіп, балаларын өз қасына алып, олармен бір үйде тұруы. Егер «Харекет» қоры көмек қолын созып, үй алуына көмектессе, біз үшін үлкен демеу болар еді. Қазір ең алдымен денсаулығын қалпына келтіріп, қалыпты өмірге қайта бейімделуіне жағдай жасап жатырмыз, – дейді Д.
Ақбаянның алдында әлі де ұзақ оңалу жолы тұр. Оның денсаулығын қалпына келтіру, қоғамға қайта бейімдеу, балаларымен бірге өмір сүруіне жағдай жасау – жақындарының қазіргі басты мақсаты. Ал ең ауыр шындықты еститін күн де алда. Жақындары бұл хабарды сіңлісінің денсаулығына салмақ салмай, барынша сақ жеткізуді ойлап отыр. Олар Ақбаянның біртіндеп күш жинап, өмірін қайта қалыптастырып, балаларымен бірге жаңа кезеңге қадам басатынына үміт артады.
Посмотреть эту публикацию в Instagram
