Алайда, партия атынан үміткер болған Бағдат Мусин жаңа депутаттар тізіміне енбеген. Ол өзінің әлеуметтік желідегі парақшасында оқырмандардың көкейінде жүрген басты сұраққа жауап беріп, алдағы жоспарларымен бөлісті.

Депутаттық мандат – басты мақсат емес

Бағдат Мусин Құрылтайға өткен әріптестерін жеңісімен құттықтай отырып, алда үлкен жауапкершілік тұрғанын атап өтті. Желі қолданушыларының «Неге Құрылтай депутаттарының тізімінде жоқсыз?» деген сауалына ол былай деп жауап берді:

«Әділет» партиясына қосылған кезде де, кандидат болуға келіскен кезде де депутаттық мандат мен үшін басты мақсат болған жоқ. Мен көп жылдан бері цифрландыру және технологиялар саласымен айналысып келемін. Бүгінде оған жасанды интеллект (AI) қосылды».

Цифрландыру және AI саласындағы ауқымды міндеттер

Ол Президенттің 2026 жылды «Цифрландыру және жасанды интеллект жылы» деп жариялағанын еске салып, ел алдында үш жыл ішінде толыққанды цифрлық мемлекетке айналу міндеті тұрғанын жеткізді.

Мусиннің пікірінше, қазіргі таңда жасанды интеллект экономиканы, еңбек нарығын, білім беру саласын және мемлекеттің өзін түбегейлі өзгертіп жатыр. Ол өзінің негізгі миссиясын дәл осы бағыттан көреді. Мемлекетке және партияға тек Құрылтайда отырып қана емес, нақты жобаларды іске асыру арқылы да пайда тигізуге болатынына сенімді.

Алда қандай нақты жобалар бар?

Партия бағдарламасында көрсетілген міндеттерді жүзеге асыру үшін ол өзінің тәжірибесі мен білімін мынадай мемлекеттік маңызы бар жобаларға жұмсамақ:

• Деректер орталықтары алқабын (Долина дата-центров) дамыту;

• 3 мың ауылды сапалы интернетпен қамтамасыз ету;

• Каспий талшықты-оптикалық байланыс желісі жобасын іске асыру.

«Дәл осы бағыттарда менің тәжірибем мен білімім қажет, әрі осы жерде көбірек пайда әкеле аламын. Сондықтан өзім жақсы білетін салада жұмысымды жалғастырып, партия міндеттерін нақты нәтижеге жеткізуге атсалысамын», — деп түйіндеді Бағдат Мусин.

 

View this post on Instagram

 

A post shared by Bagdat Mussin (@bagdatmussin)